लमजुङको घलेगाउँमा भ्यालेन्टाइन डे मनाउन पुगेको जोडी ।

-युवराज श्रेष्ठ, लमजुङ
युवा–युवती विच लोकप्रिय भ्यालेनटाईन डे अर्थात प्रणय दिवस अब शहर बजारमा मात्र सिमित रहेन । एक दशक अघिसम्म काठमाडौंको एउटा बर्गमा मात्रै सीमित भ्यालेन्टाइन डे अब गाउँगाउँमा पुगेको छ ।

लमजुङको पुरानकोट गाविसकी अनिसा गुरुङ भ्यालेनटाईन डेको अवसरमा आफ्ना प्रिय विशाल गुरुङसँग रमाउँदै छन् । गाउँ नजिकै चलेको सुन्दरबजार महोत्सवले उनीहरुलाई भेट्न र एक अर्का प्रति माया साट्न सजिलो बनायो ।

प्रेम दिवस पहिलो पटक मनाउँदै गरेको यो जोडीले भन्यो, “हाम्रो माया कहिल्यै नमरोस् ।” उनीहरूले अघिल्लो दिन फेसबुकमा कुरा गरेर आजको भेटघाट तय गरेका थिए ।

भ्यालेनटाइन डे मनाउन सुन्दरबजारका मिलन गुरुङ आफ्ना प्रेमिका भूमिकासँगै घलेगाउँ पुगे । “पहिले ‘भ्यालेन्टाईन डे’ सुनिन्थ्यो मात्र, अहिले आफैँ मनाउँदैछौँ,” प्रेमिकालाई अंगाल्दै मिलनले भने ।

व्यवसायीका लागि पनि अन्य पर्व जस्तै उपयुक्त अवसर बनेको छ । लमजुङको बेसीशहरका होटलहरु युवा–युवतीले भरिभराउ छन् । होटेलहरुमा ‘भ्यालेनटाईन डे विशेष छुट’ समेत दिइएको होटल टुकुचे पिकका रामकुमार श्रेष्ठ बताउँछन् ।

प्रणय दिवसको अवसरमा सबै भन्दा बढी त फूलकै व्यवसाय भएको छ । तिहारपछि भ्यालेन्टाइन डेमा फूल सबै भन्दा बढी बिक्री भएको शुभकामना व्युटी पार्लरकी बबिता पियाले बताईन् । उनले आजमात्रै ६ हजार रुपैयाँको फूल बेचेकी छन् ।

युवराज श्रेष्ठ, लमजुङ

प्रतिकृया दिनुहोस