अमेरिकाको न्यूयोर्ककस्थित नेपाली कन्सुलेटले अमेरिकामा बसोबास गर्दै आएका नेपालीहरुको घरदैलोमै पुगेर एमआरपी (मेसिन रिडेबल पासपोर्ट) वितरण र नविकरणका लागि फारम संकलन सेवा शुरु गरेको छ ।

कन्सुलेटले नेपालीहरुको अधिक बसोबास भएको न्यूयोर्कको क्वीन्समा पुगेर यस्तो सेवा प्रदान गर्दा उपभोक्तालाई धेरै राहत मिलेको क्वीन्सवासीहरुले बताएका छन् । नेपाल अमेरिका पत्रकार संघ, नेजासँगको सहकार्यमा कन्सुलेटले पहिलो पटक यसरी फारम संकलन तथा एमआरपी वितरण गरेको हो ।

कामको व्यस्तताका कारण एमआरपी लिन वा नविकरणका लागि फारम बुझाउन कन्सुलेटको कार्यालय पुग्न नसकेका सेवाग्राहीले घरदैलोमै सेवा पाउँदा खुशी व्यक्त गरेका छन् । कन्सुलेटका सन्ध्या पराजुलीका अनुसार एक दिनमा करिब २० जनाले यस्तो  सेवा लिए ।

अप्रवासीहरुको अधिकारको लागि कार्यरत स्थानीय संस्था अधिकारले अब हरेक महिना यस्तो सेवा सुचारु राख्न कन्सुलेटलाई सहयोग गर्ने जनाएको छ ।

नेपालीहरुको बाक्लो बसोबास रहेका अन्य शहरहरुमा पनि यस्तो सेवा विस्तार गरिने कन्सुलेटका उपबाणिज्य दुत प्रवीण भट्टराइले जानकारी दिएका छन् ।
ङिमा पाख्रिन, न्यूयोर्क

प्रतिकृया दिनुहोस