भारतीय प्रधानमन्त्री नरेन्द्र मोदीले प्राप्त गरेका उपहारहरुको लिलामीका क्रममा उनको सुटका लागि एक करोडको बोली लागेको छ ।

अमेरिकी राष्ट्रपति बराक ओबामा भारत आएका बेला मोदीले लगाएपछि चर्चामा आएको उक्त सुटमा सुनौला धागोले नरेन्द्र दामोदारदास मोदी लेखिएका धर्काहरु छन् । करिब १० लाख भारु लागतमा तयार पारिएको भनी सञ्चारमाध्यममा चर्चामा आएको उक्त सुट मोदीलाई एक व्यापारीले उपहार दिएका थिए ।

गुजरातको सुरतमा नरेन्द्र मोदीले प्राप्त गरेका ४५५ वस्तुहरुको प्रदर्शनी चलिरहेको छ । तीन दिन चल्ने उक्त प्रदर्शनीमा तेस्रो दिनको अन्तिम समयसम्ममा बढी मूल्य कबोल गर्नेले त्यहाँ रहेका सामान प्राप्त गर्नसक्नेछ । लिलामीबाट प्राप्त रकम गंगा नदी सफाई अभियानमा उपयोग गरिने बताइएको छ ।

यसैबीच मोदीलाई उक्त सुट ‘गिफ्ट’ गर्ने व्यापारी रमेश भिकाभाई विरानीले सुटको वास्तविक मूल्य कति हो भन्ने आफ्ना छोराले बुझेको बताएका छन् । उनले भने, “यो सुट पिएमले मेरो छोराको विहेका दिन लगाएका थिए, त्यो भन्दा ठूलो मूल्य अरु के हुन सक्छ ।”
एजेन्सी

प्रतिकृया दिनुहोस