राप्रपा नेपालका अध्यक्ष कमल थापाले संविधानसभामा रहेका दलहरुबीच सर्वदलीय बैठक आवश्यक रहेको बताउनुभएको छ ।

विराटनगर विमानस्थलमा १६ फागुनमा पत्रकारसँग कुराकानी गर्दै उनले विधि, प्रक्रियालाई स्थगित गरी सर्वदलीय बैठकबाट प्राप्त सुझावका आधारमा संविधान निर्माणका लागि नयाँ कार्यतालिका बनाएर अगाडि बढ्नुपर्ने धारणा व्यक्त गरे ।

उनले कांग्रेस, एमाले र एमाओवादीको गलत नीति र सत्तालिप्साका कारण मुलुक सङ्कटको चक्रब्यूहमा फसेको आरोप लगाए ।

अध्यक्ष थापाले संविधान निर्माणको विषयमा अधिकतम सहमति भइसकेको अवस्थामा केही जिल्लालाई कुन राज्यमा राख्ने विषयमा भएको विवादका कारण संविधान निर्माण कार्य अवरुद्ध भएको बताए ।

उनले आफ्नो पार्टीले प्रश्नावली तयार पार्नमा सहयोग गरेको तर, धर्म निरपेक्षता, सङ्घीयता र शासकीय स्वरुपको विषयमा प्रश्न उठाउन नपाइने भएका कारण प्रश्नावली समितिबाट बाहिरिएको जानकारी गराए ।

उनले सत्तापक्षले देखाएको गणितीय दम्भ र एमाओवादी लगायत ३० दलको शक्ति प्रदर्शन सत्तास्वार्थबाट मात्र प्रेरित रहेको उल्लेख गरे ।

प्रतिकृया दिनुहोस