इमिडिमियोलजी तथा रोग नियन्त्रण महाशाखाको इन्फ्लुन्जा हेल्थ डेस्कका संयोजक कुमारप्रसाद दाहाल भन्छन्, “१००.४ फरेनहाइटभन्दा बढी ज्वरो आयो वा सास फेर्न गाह्रो भयो भने तुरुन्तै डाक्टरलाई भेट्नुहोस् ।”

स्वाइन फ्लु कस्तो रोग हो ?

संक्रमणको कारक ‘२००९ इन्फ्लुन्जा ए (एच१एन१)’ भारइस हो भन्ने पत्ता लागेपछि विश्व स्वास्थ्य संगठनले यसलाई स्वाइन फ्लु नभन्नु भनेको छ । जनजिब्रोले भने अहिले पनि यसलाई स्वाइन फ्लु नै भन्दै आएको छ । यसलाई मौसमी इन्फ्लुन्जा पनि भनिन्छ । यसमा ज्वरोसँगै रुघा–खोकी लागेपछि सास फेर्न गाह्रो हुन्छ । सन् २००९–१० मा नेपालमा चार सहित विश्वभर करीब १९ हजारको ज्यान लिइसकेको छ, यसले ।

‘२००९ इन्फ्लुन्जा ए (एच१एन१)’ लागेको कसरी थाहा पाउने ?

घाँटी दुख्ने, खोकी लाग्ने, १००.४ डिग्रीभन्दा बढी ज्वरो आउने, जीउ कटकटी खाने, कमजोरी महसूस हुने र सास फेर्न गाह्रो भएको छ भने इन्फ्लुन्जा लागेको हुन सक्छ । प्रयोगशाला परीक्षण विना किटान भने गर्न सकिंदैन ।

कुन उमेर समूहकालाई यो रोग लाग्ने संभावना बढी हुन्छ ?

पाँच वर्षभन्दा मुनिका बालबालिका र वृद्धवृद्धाहरू बढी सतर्क हुनुपर्छ । गर्भवती महिला तथा दम, मुटु रोग, क्षयरोग जस्ता दीर्घ रोग लागेकाहरूलाई पनि यसको जोखिम समूहमा राखिएको छ । यसले बालबालिका, वृद्धवृद्धा गर्भवती महिला तथा दम, मुटुरोग, क्षयरोग जस्ता दीर्घ रोग लागेकाहरूलाई बढी सताएको छ ।

यसबाट बच्न के गर्नुपर्छ ?

मनतातो पानी र झेलियो पदार्थ बढी खानुपर्छ । संक्रमितहरूले अरूलाई जोगाउन खोक्दा, हाच्छिउँ गर्दा रुमाल वा कपडाले नाक–मुख छोप्नुपर्छ । संक्रमितसँग कुरा गर्नुपर्दा कम्तीमा एक मिटर टाढै बस्नुपर्छ । संक्रमित व्यक्ति भीडभाडमा जानु, अरूसँग हात मिलाउनु हुँदैन । संक्रमितलाई अलग राखेर उपचारको व्यवस्था मिलाउनुपर्छ ।

भारतमा महामारी भइसक्यो, नेपालमा यस विरुद्ध तयारी कस्तो छ ?

महेन्द्रनगर, सुनौली, वीरगन्ज, काँकडभिट्टा लगायतका नाकाहरूमा हेल्थ डेस्क खडा गरिएका छन् । तातोपानी नाकामा पनि तयारी भइरहेको छ । माथि उल्लेख भएका लक्षणहरू देखिने वित्तिकै ढिलो नगरी नजिकको स्वास्थ्य चौकी वा डाक्टरकोमा जान भनेका छौं । अञ्चल अस्पताल वा क्षेत्रीय अस्पतालले संकलन गरेर पठाएका नमूनालाई टेकूको राष्ट्रिय जनस्वास्थ्य प्रयोगशालामा टेस्ट गरिन्छ ।

साप्ताहिक खबरपत्रिका हिमालबाट

प्रतिकृया दिनुहोस