पूर्वराजा ज्ञानेन्द्र शाहको शासनका बेला मन्त्री बनेका राधाकृष्ण मैनाली त्यसपछि माओवादीहुँदै १२ वर्षपछि पुनः नेकपा (एमाले) फर्किएका छन् । १७ फागुनमा पार्टीमा केन्द्रीय सदस्य मनोनीत मैनाली भन्छन्, “खुशी छु । तर, आफ्नै पार्टीमा नयाँ जस्तो हुँदाको अनुभव अनौठो हुँदोरहेछ ।”

१२ वर्षपछि एमाले फर्कनुभयो । कस्तो लागिरहेको छ ?

त्योबेला निष्काशनमा परेको थिएँ । त्यसैले नबोलाई आउने कुरा भएन । तीन वर्षदेखि पार्टीले बोलाएको हो तर ढिलो भयो । पार्टीमा फर्कंदा खुशी छु । तर नयाँ जस्तो हुँदाको अनुभव अनौठो हुँदोरहेछ ।

यो अवधिमा तपाइँ राजावादीदेखि माओवादीसम्म हुनुभयो ? के पाउनुभयो ?

घरबाट निकालिएको मान्छे भीर, पखेरा, सडक कहाँ पुग्छ, कहाँ । राजाले द्वन्द्व समाधानमा राजनीतिक व्यक्ति पनि चाहियो भनेकाले मन्त्री बनें । तर, राजा स्वार्थी रहेछन् । माओवादी नेताहरूको आग्रहमा माओवादी प्रवेश गरें । तर हतियार बिसाए पनि उनीहरूको स्वभाव, चिन्तन र व्यवहार द्वन्द्वकालीन नै रहेछ ।

अब चाहिं किन एमालेमै फर्कनुभएको ?

यो पार्टीमा म झापा विद्रोहदेखि नै लागेको हुँ । सबैभन्दा ठूलो कम्युनिष्ट पार्टी भएकोले मात्र होइन, विचार पनि मिल्ने भएकाले फर्केको हुँ ।

भनेपछि, एमाले ठीक थियो, तपाईं नै बहकिनुभयो ?

हो । सांगठनिक रुपमा बहुपदीयमा गए पनि पदाधिकारी संख्या अलि सानो हुनुपर्छ । गुट भन्दा पार्टी बलियो बनाउन जोड दिनुपर्छ भन्ने मेरो विचार छ ।

अनुभवी राजनीतिज्ञको नाताले नयाँ संविधान निर्माण प्रक्रियालाई कसरी हेरिरहनुभएको छ ?

प्रमुख पार्टीको पहिलो प्राथमिकता संविधान निर्माण हुनुपर्छ । सत्तालाई महत्व दिएकै कारण संविधान ढिला भएको हो । पुष्पकमल दाहालको संविधान निर्माणमा बढी योगदान हुनुपर्दथ्यो । अन्तरवस्तुमा जति विवाद भए पनि मिलनबिन्दु हुन्छ नै ।

साप्ताहिक खबरपत्रिका हिमालबाट

प्रतिकृया दिनुहोस