नेपाल निवास कोटेश्वरमा १२ कार्तिक साँझ भएको भेटमा नेता नेपालले प्रधानमन्त्री  भट्टराईलाई देशमा विद्यमान राजनीतिक गतिरोध हटाएर समस्या समाधानका निम्ति बाधक नबन्न आग्रह गरेका छन् ।

“देशमा राजनीतिक सङ्कट हटेर मुलुकले निकास पाओस् र संविधान बनोस् भन्ने पक्षमा म छु र सहमतिको लागि म बाधक छैन, सहमतिको लागि तपाइँले पनि पहल गर्दिनुस्,” प्रधानमन्त्री  भट्टराईको भनाई उद्धृत गर्दै नेपालले भने ।

त्यस अवसरमा निर्वाचनमा जानुको विकल्प नभएको भन्दै नेपालले आउँदो चैत वैशाख महिनामा चुनाव हुन नसके एकाध वर्ष अझै मुलुक समस्यै समस्यामा अल्झिने खतरा रहेको धारणा राखेका थिए ।

नेता नेपालले यही सरकारको नेतृत्वमा चुनाव गर्नुपर्छ भन्ने अडानमा नरहन प्रधानमन्त्रीलाई आग्रह गरेपछि जवाफमा प्रधानमन्त्री  भट्टराईले आफू त्यस्तो अडानमा नरहेको बताएको नेपालले जानकारी दिए ।
“यो सरकारको नेतृत्वमा चुनाव सम्भव छैन, संविधानसभा पुनःस्थापनाको दन्तबझान गर्नु पनि जरुरी छैन,” वरिष्ठ नेता नेपालले भने । प्रधानमन्त्री डा भट्टराईले भेटवार्तामा भएका कुरा आफ्ना पार्टी अध्यक्षसँग राखेर निकासका लागि अघि बढ्ने बताएका थिए ।

प्रधानमन्त्री र नेता नेपालबीच मुलुकमा रहेको ऊर्जा सङ्कट, द्रूत मार्ग तथा मध्यपहाडी मार्ग, विमानस्थल निर्माणलगायतका आर्थिक विकासका कामहरू अघि बढाउने बारेमा पनि छलफल भएको थियो । रासस

प्रतिकृया दिनुहोस