-देबकी बिष्ट

‘‘सबैले सोध्छन्, जीवन काँडा कि फूल ? अब भन्छु जीवनलाई जस्तो बनयो उस्तै हुन्छ । जीवन सृष्टिको सुन्दर फुल हो ।”
साहित्यकार झमक घिमिरेकी साथी अनिता लामाले झमकले लेखेकी यी शब्द पढ्दै गर्दा सभा हल तालीले गुञ्जियो ।

उनको थप शब्द पढियो, ‘‘जीवनलाई म काँडा भन्दिन । काँडाले सोच्दा घोच्छ । दुःख दिन्छ । त्यसैले जीवन सृष्टिको सुन्दर फूल हो भन्छु ।’’

झमक घिमिरेले लेखेकी आत्मकथा ‘जीवन काँडा कि फूल’को सुन्ने संस्करण विमोचन गर्न होटल अन्नपूर्णमा आयोजित कार्यक्रमको सुरुवात यसरी भयो । त्यसपछि विमोचनको औपचारिकता अघि बढ्यो ।

संचारकर्मी तथा साहित्यकार खगेन्द्र नेपालीको स्वरमा रेकर्ड गरिएको घिमिरेको आत्मपरक निवन्ध ‘जीवन काँडा कि फूल’को सुन्ने संस्करण नेपाल प्रज्ञा प्रतिष्ठानका पूर्व कुलपति बैरागी काइलाले विमोचन गरे ।

सूर्य नेपालको सहयोगमा निर्मित सुन्ने संस्करणको विमोचनपछि कृतिका लेखिकाबारे समीक्षा सुरु भयो । साहित्यकार डा गोविन्द भट्राईले झमक शारिरीक रुपले अशक्त भएपनि आत्मामा एक अद्भूत शक्ति भएको बताए ।

उनले भने, ‘‘विश्वका मष्तिस्क पक्षघात भएका ११ जना मध्ये एशियामा मात्र एक विशिष्ट महिला झमक हुनुले गर्वको विषय हो ।’’

प्रतिकृया दिनुहोस