फाइल तस्वीर

प्रिय,  बहिनी पूजा,

मानिस जन्मेपछि मर्नैपर्छ । विज्ञानको विकासले मानिस जन्मने मिति भने पनि को, कहिले र कसरी मर्छ भन्न सकेको छैन ।

तर, हाम्रो समाजमा बलात्कृत छोरीहरु भने पटक–पटक मरिरहेकै छन् । यसरी पलपल मरेर बाच्ने छोरीहरुमध्ये म पनि एक हुँ । आफ्नैहरुबाट बलात्कृत भएर बाँचिरहेकै छु । चाहेर पनि मर्न सकिन । र दिनरात कामना गरिरहन्छु, मैलेजस्तो पीडा अरुले भोग्न नपरोस् ।

तर, जब मैले ६ बर्षको कलिलो उमेरमा तिमी बलात्कारबाट अचेत भयौ । अस्पतालमा उपचार हुँदै गर्दा तिम्रो मृत्यु भयो भन्ने खबर सुनेँ । छाँगाबाट खसेझै भएँ । मेरा आँखाहरु रसाए । थामिएनन् आँसु ।

आँखा अगाडि आफ्नै विगतको पीडा र नारकीय दैनिकी झलझली याद आयो । मन भतभती पोल्यो । कसलाई के भनूँ । घरी शब्दहरु भक्कानिएर मन भारी भयो,  घरी  अपराधी सम्झेर रिसले चूर भए ।

ती साना नानीलाई बलात्कार गर्ने हाम्रै दाजुभाई नै हुन् भन्न घीन लाग्यो । यस्तो राक्षसी पुरुषहरुबारे केही बुझ्न सकेकी छैन । टाउको भारी हुन्छ । दिमागले सोंच्न सक्दैन । टोलाइरहने, बर्बराउने भइरहन्छ ।  म नै पूजा हुँ जस्तो लाग्छ ।

पूजाको मृत्युलाई चिकत्सकीय भाषामा  बलात्कारबाट मृत्यु भनियो  । तर, तिम्लाई के थाहा र आफूमाथि भएको त्यो क्रुर र बर्बर आक्रमण बलात्कार थियो भनेर । काखमा खेल्ने फूलजस्तै नानी बलात्कारबाट गुमाउनुको पीडाले परिवारमा कस्तो बज्रपात परेको होला ? मैले भोगेकी छु त्यो पीडा  । सास फेर्न अप्ठ्यारो हुन्छ । आखिर  किन दिनहुँ बलात्कृत  भइरहन्छन महिला ?

पूजा ! उस्तै हो तिम्रो र मेरो भोगाई । तिमी ‘बलात्कार’ नबुझेरै स्वर्गे भयौ  । म आफ्नै बा र हजुरबाबाट बलात्कृत भएर पनि मर्न सकिन । मृत्युको मुखमा पुगेर पनि बाँचेकी छु ।  हाम्रा पीडकहरुका विरुद्ध लड्दैछु । प्यारी बहिनी, म बाँचेसम्म लडिरहनेछु ।

हाम्रो देशको गृहमन्त्रीले ११ चैतमा दिएको अभिव्यक्ति सुनेर म झनै चकित भएँ । के संक्रमणकाल भएकाले हामीले बाँच्नै नपाउने हो ? गृहमन्त्रीलाई सोध्न चाहन्छु, पूजा छोरी भएर जन्मनु उनको अपराध थियो  ? हामी बलात्कृतहरु अपराधि हौं ? के भनेको गृहमन्त्रीजी,  ‘संक्रमणकाल भएकाले बलात्कार हुन्छ भनेर  ।

बेलुन हान्ने र रंग खेल्नेलाई रातारात कानून बनाउन सक्ने सरकारले बलात्कार जस्तो अपराधमा किन कडा सजायको कानून बनाउन  सक्दैन ? गृहमन्त्रीजी हाम्रो अस्मिता र जीवनमाथि अव मजाक नगर्नुहोस् । मर्दै बाँच्ने छोरीहरु धेरै भइसक्यौं । यसले अर्काे अनिष्ट ननिम्त्याओस् । हामीलाई न्याय दिनुहोस् ।

प्रिय पूजा, आफू जति नै पटक बलातकृत भए पनि, म यो अन्यायविरुद्ध लडिरहने छु । मलाई शक्ति देऊ ।

तिम्री दिदी,
पूजा कार्की

प्रतिकृया दिनुहोस