ब्लगर वशिकुर रहमान

बांग्लादेशमा ब्लगर अविजीत रायको हत्या भएको एक महीनापछि अर्का ब्लगरको चक्कु प्रहार गरी हत्या भएको छ ।

स्थानीय प्रहरीका अनुसार २७ वर्षीय वशीकुर रहमानको १६ चैत विहान राजधानी ढाकाको बेगुनबारीस्थित आफ्नै घर नजिक हत्या भएको हो ।

प्रहरीले हत्या आरोपमा स्थानीय मदरसाका दुई छात्रलाई गिरफ्तार गरेको बंगलादेशको अनलाइन पत्रिका डेलीस्टारले उल्लेख गरेको छ ।

ढाका प्रहरीका अनुसार आक्रमणकारीहरुले रहमानले इस्लामविरोधी लेख लेखेकोले हत्या गरिएको बयान दिएका छन् । ट्राभल एजेन्सीमा कार्यरत रहमानले कस्तो ब्लग लेख्थे भन्ने चाहीं खुल्न नसकेको डेलिस्टारले जनाएको छ ।

एक महिनाअघि मात्रै ढाकामा भारतीय मूलका अमेरिकी लेखक अविजीत रायको हत्या भएको थियो ।

अविजीतको हत्यापछि विद्यार्थी र सामाजिक कार्यकर्ताहरुले ढाकामा विरोध प्रदर्शन गरेका थिए । अविजीत धार्मिक कट्टरपंथ विरुद्ध आवाज उठाउँथे ।
एजेन्सीहरु

प्रतिकृया दिनुहोस