राष्ट्रिय लिग फुटबल प्रतियोगिता अन्तर्गत आज भएको खेलमा विभागीय टोली सशस्त्र प्रहरी बल (एपीएफ)ले नेपाल प्रहरी क्लबलाई पराजित गर्दै विजयी भएको छ ।

त्रिपुरेश्वरिस्थत दशरथ रङ्शाला मैदानमा भएको खेलमा एपिएफले प्रहरीमाथि २–० को सहज जित निकाल्दै विजयी भएको हो । यस जीतसँगै एपीएफले जारी प्रतियोगितामा सात अङ्क जोडेको छ ।

एपीएफको जितमा रञ्जन विष्ट नायक बने । उनले खेलको पहिलो हाफको १० मिनेटमा गोल गर्दै पहिलो अग्रता लिए । विष्टले प्रहरीको डिफेन्डरलाई छलाउँदै गोल गर्न सफल भएका थिए ।

त्यस्तै खेलको दोस्रो हाफमा विष्टले पुनः गोल थप्दै आफनो नाममा व्यक्तिगत दुई गोल गरे । उनले खेलको ५९ औँ मिनेटमा डिबक्स नजिकबाट गोल गर्दै आफ्नो टिमको जित सुनिश्चित गरे ।

प्रहरीले खेलको विभिन्न समयमा पाएको अवसरलाई भने सदुपयोग गर्न सकेको थिएन । जारी प्रतियोगितामा तीन खेल खेलेको प्रहरी तीन नै खेलमा हार बेहोर्दै अङ्कविहीन छ ।

खेलपछि एपिएफका प्रशिक्षक कृष्ण थापाले यसअघिको प्रतियोगिताहरूमा भन्दा पनि लिगमा आफनो टिमले निकै राम्रो खेल प्रर्दशन गरेको बताए ।

प्रशिक्षक थापाले लिगमा सहभागी टिमसँगै अन्य टिमसँगै आफ्नो टिम पनि बलियो नै भएकाले राष्ट्रिय लिगको उपाधि जित्ने सम्भावना कायमै रहेको टिप्पणी गरे ।

प्रतिकृया दिनुहोस