राजधानीस्थित दशरथ रंगशालामा २१ फागुनमा बंगलादेशसँग २–० गोलले हारेपछि नेपालले महत्वपूर्ण तीन अंक गुमाएको हो ।

यसअघिका खेलमा घरेलु मैदानमा तुलनात्मक रुपमा राम्रो प्रदर्शन गर्दै आएको टीम नेपालले बंगलादेशसँगको खेलमा दर्शकलाई निराश बनाए । खेलको २७ औं मिनेटमा रेफ्रीले दिएको विवादस्पद पेनाल्टी गोलमा परिणत भएपछि नेपाल ०–१ ले पछि पर्यो । खेलको ५७ औं मिनेटमा बंगलादेशले अर्को गोल गरेर अग्रता दोब्बर बनायो ।

१९ फागुनमा नर्दन मेरियाना आइल्याण्डलाई ६–० ले पराजित गरेको नेपाल र बंगलादेशले दुई/दुई खेलबाट समान तीन अंक जोडेका छन् । दुई खेलबाट छ अंक जोडेको प्यालेष्टाइन समूहको अग्रस्थानमा छ । नर्दन मेरियानाले भने खाता खोल्न सकेको छैन ।

आजै भएको अर्को खेलमा प्यालेष्टाइनले नर्दन मेरियानालाई ९–० को विशाल अन्तरले पाखा लगाएको थियो । समूहमा सबै भन्दा बलियो प्रतिद्वन्द्वी प्लेष्टाइनसँग नेपालको भेट २३ फागुनमा हुँदैछ । प्यालेष्टाइनलाई पराजित गरे मात्रै नेपालको छनौट चरण पार हुने सम्भावना जीवित रहन्छ ।

समूह विजेता टीम सन् २०१४ मा माल्दिभ्समा हुने एएफसी च्यालेन्ज कपका लागि छनौट हुन्छ । समूह ए, बि, सि र डिका उपविजेता मध्ये शीर्ष दुई टीमले पनि च्यालेन्ज कप खेल्न पाउने छ ।

प्रतिकृया दिनुहोस