इटलीका मारियो बालाटेली र स्पेनका सरजीओ रामोस

युरोपियन फुटबल महासंघले आयोजना गरेको युरो २०१२ को उपाधि हात पार्न १७ असार राति साढे १२ बजे युक्रेनको ओलम्पिक स्टेडियममा स्पेन र इटलीबीच प्रतिस्पर्धा हुँदैछ । साविक विजेता स्पेन तेस्रो पटक उपाधि चुम्ने योजनामा छ । उसले १९६४ मा सोभियत युनियन र २००८ मा जर्मनीलाई पराजित गरेर युरो कप जितेको थियो । उता १९६८ मा युगोस्लाभियालाई फाइनलमा हराएको इटली अहिले स्पेनलाई पाखा लगाएर दोस्रो पटक युरोकप च्यापियन बन्न चाहन्छ । १९८४ मा स्पेन र २००० मा इटली फाइनल पुगेर पनि उपाधि जित्न सकेका थिएनन् । त्यतिबेला स्पेन र इटली दुबैको उपाधि होडमा फ्रान्स बाधक बनेको थियो ।

यसअघिको २५ खेलमा इटलीले ८ जीत र स्पेनले ७ जीत निकालेको छ भने १० वटा खेल बराबरीमा सकिएको छ । समूह सी मा रहेको स्पेन र इटलीबीच १० जुलाईको भेटमा १-१ गोलमा खेल सकिएको थियो । सात अंक सहित समूह विजेताको रुपमा क्वाटरफाइनल प्रवेश गरेको स्पेनले लिग चरणमा आयरल्याण्डलाई ४-० र क्रोयसियालाई १-० ले पराजित गरेको थियो । समूह सीबाटै चार अंक जोडेर क्वाटरफाइनल पुगेको इटलीले आयरल्याण्डलाई २-० ले स्तब्ध पारेको थियो भने क्रोयसियासँग १-१ को बराबरी खेलेको थियो ।

समूह डीको विजेता इंग्ल्याण्डको चुनौति पेनाल्टी सुटआउटमा ४-२ ले समाप्त पारेर अन्तिम चारमा स्थान सुरक्षित गरेको इटलीले सेमीफाइनलमा जर्मनीलाई २-१ ले हराएपछि स्पेनसँगको भेट पक्का भयो । स्पेनले समूह डीको उपविजेता फ्रान्सको यात्रा २-० गोल अन्तरले क्वाटरफाइनलमै सिमित गरिदियो । सेमीफाइनलमा पोर्चुगललाई पेनाल्टी सुटआउटमा ४-२ गोल अन्तरले पाखा लगाएर स्पेन फाइनलमा पुगेको हो ।

युरो २००८ मा स्पेनले इटलीलाई पेनाल्टी सुटआउटमा ४-२ ले पराजित गरेको थियो । १० अगस्त २०११ मा भएको मैत्रीपूर्ण म्याचमा इटलीले स्पेनलाई २-१ ले हराएको थियो । फिफा बरियाताको नम्बर १ मा रहेको स्पेन र १२ नम्बरको इटली मध्ये युरो २०१२ च्याम्पियन को बन्छ ठोकुवा लगाउन गाह्रो छ । फुटबलसम्बन्धी चर्चित वेभसाइट गोल डटकमको जनमतमा सहभागी मध्ये ५५ प्रतिशतले इटली र ४५ ले स्पेन विजयी हुने अनुमान गरेका छन् । २४ प्रतिशतले इटलीको २ र स्पेनको १ तथा १४ प्रतिशतले स्पेनको २ र इटलीको १ गोल हुने अनुमान लगाएका छन् ।

प्रतिकृया दिनुहोस