हेटौंडा–६ गौरीटारस्थित खेल मैदानमा भएको एनसेल राष्ट्रिय महिला फुटबल प्रतियोगिताको फाइनमा फाइनल प्रतिष्पर्धामा नेपाल प्रहरीले सशस्त्र प्रहरीको एपीएफ क्लबलाई १–० गोलले हराउँदै विजयी भएको छ ।

निकै प्रतिष्पर्धात्मक खेलको ८५ औं मिनेटमा एपीएफकै सजना रानाले गरेको आत्मघाती गोलबाट पुलिसले उपाधि जित्न सकेको हो ।

खेलको पहिलो हाफमा पुलिसलाई दबाबमा राखेको भएपनि राम्रो मुभ बनाउन नसक्दा एपीएफले हार ब्यहोर्नुपर्‍यो ।

१–० ले पछि परेपछि निकै आक्रामक देखिएको एपीएफले गोल फर्काउन नसकेपछि लगातार चार पटक उपाधि हात पार्ने धोको पूरा गर्न सकेन । एनसेल फुटबलमा पुलिसले पहिलोपटक एपीएफलाई पराजित गरेको हो ।

जितसँगै पुलिसले नगद तीन लाख, शिल्ड, पदक र प्रमाणपत्र प्राप्त गरेको छ भने एपीएफले एक लाख ५० हजारमै चित्त बुझाएको छ ।

सेमिफाइनल प्रवेश गर्ने कैलाली र नेपाल आर्मीले ५०/५० हजार प्राप्त गरेका छन् । नवलपरासी र हेटौंडामा संयुक्तरुपमा संचालित प्रतियोगितामा २५ जिल्ला र ३ विभागीयसहित २८ टिमले भाग लिएका थिए ।

एपीएफकी सजना राना भने प्रतियोगिताकै उत्कृष्ट खेलाडी घोषित हुँदै यामाहाको स्कुटर प्राप्त गरिन् । प्रतियोगिता अवधिभर उनले सर्वाधिक १६ गोल गरेकी थिइन् ।

नेपाल प्रहरीकी निरु थापा, घिमकुमारी गुरुङ र नमिता दली क्रमशः उत्कृष्ठ फरवार्ड, उत्कृष्ठ डिफेन्स र उत्कृष्ट गोलरक्षक घोषित भए । उत्कृष्ट मिडफिल्डर एपीएफकी नमिता नगरकोटी भइन् । सबैले जनही नगद २५ हजार रुपियाँ प्राप्त गरेका छन् । प्रतियोगिताका बिजेता तथा उपबिजेतालाई एन्फाका महासचिव धिरेन्द्र प्रधान, एनसेलकी कम्युनिकेशन डाइरेक्टर सञ्जु कोईराला, मध्येक्षेत्रका डिआईजी विज्ञानराज शर्मालगायतले पुरस्कार वितरण गरेका थिए ।

अशोकसुजन श्रेष्ठ/हेटौँडा

प्रतिकृया दिनुहोस