खेलकुदमंगलबार, फाल्गुण २७, २०७०
नेपाली क्रिकेट विश्वसामु देखाउँछौं: पारस खड्का
बंगलादेशस्थित ढाका होटलमा २६ फागनुमा आयोजित पत्रकार सम्मेलनमा कप्तान खड्काले नेपाली टिम उपस्थिती जनाउनलाई मात्र बंगलादेश नआएको बताए । “यो स्तरमा पुग्न हामी एक दशकभन्दा बढी समयदेखि संघर्ष गरिरहेका छौं,” उनले भने, “त्यसैले यो विश्वकपमा सहभागिता जनाउनका लागि मात्र हामी खेल्ने छैनौं ।”
खड्काको भनाइलाई उद्दृत गर्दै ईएसपीएन क्रिक्इन्फो डट कमले लेखेको छ, “नेपालका लागि यो ठूलो अवसर हो ।” “हामी ट्वान्टी–२० विश्वकप क्रिकेटमा छनौट भएका छौं र तीन महीनादेखि मिहनेत गरिरहेका छौं भन्नु गलत हुन्छ,” उनले भनेका छन्, “हामी १०–१२ वर्षदेखि कडा मिहनेत गर्दै निरन्तर क्रिकेट नै खेलिरहेका छौं, हामी यहाँ पूरै प्रतिस्पर्धा र हाम्रो क्षमताको प्रदर्शन गर्नेछौं, यदि हाम्रो क्षमता अनुसार खेल्यौं भने राम्रो नतिजा निकाल्ने छौं ।”
उनले विश्वकपको सहभागिताले नेपालमा क्रिकेटको बढावा हुने बताएका छन् । “फूटबल र क्रिकेट दुवै खेल नेपालमा उत्तिकै लोकप्रिय छन्, सबैले हामीलाई समर्थन गर्छन्, बच्चाहरुले खेल मन पराउँछन्, यो साँच्चै नै उत्साहजनक छ,”कप्तान खड्काले भने, “नेपालमा क्रिकेट फ्यानको संख्या कुनै पनि टेष्ट क्रिकेट खेल्ने देशकोभन्दा कम छैन ।”
ट्वान्टी–२० विश्वकप क्रिकेट खेल्न नेपाली क्रिकेट टीम बंगलादेश पुगिसकेको छ । बंगलादेशमा २ चैतदेखि शुरु हुने ट्वान्टी–२० विश्वकप क्रिकेट २३ चैतसम्म चल्नेछ ।
नेपाल सहितका ८ टीमले भने विश्वकपको समूह चरण खेल्नु पर्नेछ । समूह चरण खेल्ने नेपाल, अफगानिस्तान, हङकङ, आयरल्याण्ड, नेदरल्याण्डस्, युएई, बंगलादेश र जिम्बाबेमध्ये दुई टीमले सुपर टेन चरणमा प्रवेश पाउने छन् ।
बंगलादेश र जिम्बाबे टेष्ट मान्यताप्राप्त टीम हुन् । समूह चरणमा नेपालले बंगलादेश, अफगानिस्तान र हङकङको सामना गर्नुपर्नेछ ।
प्रतिकृया दिनुहोस
ताजा अपडेट
हिमालखबर जनमत
