योजना तथा अनुगमन समिति बनाउने सहमति गर्दै ३ बैशाखमा भएको राष्ट्रिय क्रिकेट टोलीका खेलाडी र क्यानबीच सहमति भएपछि खेल बहिस्कार गरेका खेलाडीहरु मैदानमा फर्कने भएका छन् ।

दोस्रो दिन ३ बैशाखमा क्यानको कार्यालय नयाँ बानेश्वरमा भएको वार्तामा क्रिकेटको विकास र विस्तारलाई योजनाबद्व रूपमा अघि बढाउन राष्ट्रिय खेलकुद परिषद्का सदस्य सचिव युवराज लामाको संयोजकत्वमा पाँच सदस्यीय समिति गठन गर्ने निर्णय भएको छ ।

लामाको संयोजकत्वमा रहने समितिमा युवा तथा खेलकुद मन्त्रालयका उपसचिवभन्दा माथिल्लो स्तरका प्रतिनिधि, नेपाल क्रिकेट संघका प्रतिनिधि तथा राष्ट्रिय क्रिकेटका प्रशिक्षक पुबुदु दसानायके र राष्ट्रिय टिमका कप्तान पारस खड्का सदस्य रहनेछन् ।

सहमतिमा समितिले आफ्नो कार्यविधि आफैं निर्धारण गर्ने उल्लेख छ । त्यसैगरी समितिले दिएको सुझाव क्यानले लागु गर्नु पर्ने र त्यसको अनुगमन समितिले गर्ने पनि ब्यवस्था गरिएको छ ।

त्यस्तै खेलाडीले क्यानसँग राखेका लिखित मागलाई यथाशीघ्र पूरा गर्ने निर्णय पनि भएको छ ।

क्यानको गतिविधिप्रति असन्तुष्टि जनाउँदै राष्ट्रिय टिमका खेलाडीले सिनियर वान(डे राष्ट्रिय प्रतियोगिता बहिष्कारको घोषणा गरेपछि विवाद बढेको थियो ।

राति अबेरसम्म चलेको वार्तामा राखेप सदस्य सचिव लामाले संयोजन गरेका थिए ।

“सदस्य सचिवको नेतृत्वमा समिति बनेकोले क्रिकेट क्षेत्रका समस्या समाधान हुनेछन् भन्ने विश्वास बढेको छ,” खेलाडी कप्तान पारस खड्काले भने ।

क्यान उपाध्यक्ष चतुरबहादुर चन्दले आफूहरुबाट गल्ती भएको स्वीकार्दै सुधारका लागि तयार रहेको भएको बताए ।
उनले प्रमुख कार्यकारी अधिकृत र फाइनान्स म्यानेजर तुरुन्तै राख्नेबारे काम अघि बढेको जानकारी पनि दिए ।

प्रतिकृया दिनुहोस