तस्वीरः गोलनेपाल डट कम

उन्नाइस खेलाडीलाई पछि पार्दै नेपाली राष्ट्रिय टोलीका स्ट्राइकर अनिल गुरुङ्गले ‘एनसेल प्लेयर अफ द इयर २०७०’ को उपाधि जितेका हुन् । अखिल नेपाल फूटबल संघ (एन्फा)ले ८ बैशाखमा पुरस्कारको घोषणा गरेको हो ।

एन्फाले सर्वसाधारण, राष्ट्रिय खेलकुद परिषद तथा एएफसीबाट मान्यता प्राप्त ८८ जना प्रशिक्षक र खेल पत्रकारले गरेको मतका आधारमा उत्कृष्ट खेलाडी चयन गरेको हो । सर्वसाधारणको ६० प्रतिशत, प्रशिक्षकको २० प्रतिशत र पत्रकारको २० प्रतिशत मत समावेश गरिएको थियो ।

जम्मा मतमध्ये अनिल गुरुङ्गले सर्वाधिक १ लाख ६४ हजार ५२९ मत पाएका थिए । उनीसँगै उत्कृष्ट तीनमा भरत खवास र भोलानाथ सिलवाल परे । गत वर्ष यो उपाधि राष्ट्रिय टीमका डिफेन्डर सन्दिप राईले जितेका थिए ।

पुरस्कारका लागि २० खेलाडी मनोनयनमा परेका थिए । दोस्रो स्थान प्राप्त गरेका खवास प्रशिक्षक र पत्रकारको नजरमा उत्कृष्ट ठहरिए । तर, उनलाई सर्वसाधारणले १ हजार ६७९ मात्र मत दिए ।

सिलवालले भने सर्वसाधारणको ८३६ मत मात्र  पाए । एन्फा कम्प्लेक्स सातदोबाटोमा ८ बैशाखमा आयोजित कार्यक्रममा युवा तथा खेलकुद मन्त्री पुरुषोत्तम पौडेलले अनिल गुरुङ्गलाई कारसँगै चावी हस्तान्तरण गरे ।

सन् २००५ मा राष्ट्रिय टीममा डेब्यू गरेका अनिल भरपर्दा स्ट्राइकर हुन् । मनाङ्ग मस्र्याङ्गदी क्लबबाट व्यवसायिक फूटबल खेल्ने उनले ब्रिगेड ब्वाइज, थ्री स्टार, एनआरटी र भारतीय क्लब सिलोङ्ग लाजोङ्गबाट पनि व्यबसायिक फूटबल खेलिसकेका छन् ।

अनिलले पहिलोपटक ठूलो पुरस्कार पाउँदा खुसी लागेको बताए । उनले भने, “यस्ता पुरस्कारले खेलाडीको मनोबल बढ्छ र फूटबलकै विकास हुन्छ ।”

प्रतिकृया दिनुहोस