प्रतियोगिताको दौरान सामाजिक सञ्जालमा ठुलो मात्रामा शुभकामना र समर्थन देखिएको थियो भने जितपछि बधाइको ओइरो । मलेसियाको राजधानी क्वालालम्पुरको किनरारा एकेडेमी ओवलमा सञ्चालित आइसीसी वर्ल्ड क्रिकेट लिग डिभिजन फोरको फाइनलमा नेपालले संयुक्त राज्य अमेरिकालाई ८ विकेटले हराएपछि डिभिजन चारको विजेताको रुपमा वर्ल्ड क्रिकेट लिग डिभिजन तीनमा छनौट हुने ऐतिहासिक सफलता पाएका छन् । हुनत २४ गते डेनमार्कविरुद्ध जित दर्ता गरेसँगै छनौट हुने पक्का भैसकेपनि प्रतियोगितामा अपराजित रहँदै उपाधि जित्नु प्रतिष्ठाको विषय बनेको हो ।

अगष्ट २०१० मा इटलीमा सम्पन्न डिभिजन चारमा तेस्रो भएपछि २०११ को वर्ल्ड क्रिकेट लिग डिभिजन तीन खेल्ने सपना चकनाचुर भएको थियो । तर यस पटकको उपलब्धिले भने डिभिजन तीनमा प्रवेशसँगै २०१५ मा आयोजना हुने विश्वकपमा छनौटको आशा पलाएको छ ।
विश्वकपमा छनौट हुने प्रक्रिया
अप्रिल २०१३ मा बर्मुडामा हुने डिभिजन ३ मा नेपालले अमेरिका, इटली, युगान्डा बर्मुडा र ओमानसँग खेल्नेछ । डिभिजन ४ का प्रथम दुई टोली २०१४ को आइसीसी वर्ल्ड कप क्वालीफायर्समा प्रवेश गर्नेछन् । नेपाल प्रथम दुईमा पर्न सकेको खन्डमा दश टोली सम्मिलित प्रतियोगितामा भाग लिन पाउनेछ जस मध्ये दुई (पपुवा न्युगिनी र हङ्कङ) मुलुकको टुङो लागिसकेको छ भने अन्य ६ टोली २०१३ को आइसीसी अन्तरमहादेशिय कपबाट छानिनेछन् । आयर्लन्ड्, स्कट्लन्ड, नेदर्लन्ड्स्, युएइ, अफ्गानिस्तान, केन्या, क्यानडा र नामिबिया गरी ८ मुलुकले प्रतिस्पर्धा गरिरहेको आइसीसी अन्तर-महादेशिय कपबाट प्रथम दुई टोली सोझै विश्वकप खेल्न पाउनेछन् भने बाँकी छ टोलीले वर्ल्डकप क्वालीफायर्स खेल्नेछन् । यदि यस प्रतियोगितामा उत्कृष्ट दुईमा पर्न सकेमा नेपाल २०१५ को विश्वकपमा छनौट हुने छ ।

नेपालको विजय यात्रा
१८ भदौ
सिङ्गापुर १११ (३९.५) (अमृत ४-२८, बसन्त ३-३०)
नेपाल ११२-५ (२४.५) (प्रदीप ३४ शक्ति १८) नेपाल ५ विकेटले विजयी
२० भदौ
टान्जानिया ८२ (३१.४) (पारस ४-२४, बसन्त १४-३)
नेपाल ८३-२ (१९.४) (ज्ञानेन्द्र २८ सुबास २० ) नेपाल ८ विकेटले विजयी

२१ भदौ
मलेसिया ६९ (३२.१) (बसन्त ३-१२, शक्ति १०-८-३-२ )
नेपाल ७१-० (१२.२) (अनिल ४१ सुबस २४) नेपाल १० विकेटले विजयी

२२ भदौ
नेपाल २५८-८ (५०) (सुबास ११५, ज्ञानेन्द्र ४६, पारस ४१)
अमेरिका २२६-१० (४८.२) (बसन्त ५-३५, शक्ति २-४५, सन्जम २-५०) नेपाल ३२ रनले विजयी

२४ भदौ
नेपाल २४०-१० (५०) (अनिल ११३, शरद २७)
डेनमार्क १३०-९ (३१) (पारस ४-३४, सन्जम २-२२) (नेपाल डक्वर्थ लेविस प्रणालीका आधारमा २५ रनले विजयी)
२५ भदौ
अमेरिका १४५-१० (४८.१) (बसन्त ५-२०, शक्ति २-२३)
नेपाल १४७-२ (२८) (सुबास ४०, ज्ञानेन्द्र ६६) नेपाल ८ विकेटले विजयी
ब्यक्तिगत प्रदर्शनको चर्चा गर्नुपर्दा नेपालका प्राय: सबै खेलाडीले राम्रो योगदान दिएका थिए । टिम गेम र विनिङ स्पिरिटमा कुनै कमी देखिएको थिएन । बलिङ सधैं झै धारिलो थियो र यस पटक ब्याटिङ पहिलेका प्रतियोगितामा भन्दा निकै सुध्रिएको देखियो । प्राय: कमजोर ब्याटिङले निराश बनाउने खेलाडीहरुले यस पटक आफ्नो प्रतिभा अनुसारको खेल प्रदर्शन गरेका थिए । विशेषगरी सुबास खकुरेल, ज्ञानेन्द्र मल्ल, अनिल मन्डलको ब्याटिङ तथा अमृत भट्टराई, शक्ति गौचन र बसन्त रेग्मीको बलिङ अनि पारस खड्काको उत्कृष्ट अलराउन्ड प्रदर्शन र कुशल कप्तानीको कारण नेपाल प्रतियोगिताका अन्य टोलीभन्दा निकै अब्बल देखियो ।
डिभिजन चारमा तेस्रो सर्वाधिक रन बनाएका सुबास खकुरेलले प्रतियोगिता अवधीभर छ इनिङ्समा ५२ को औसत र ६४.६९ को स्ट्राइक रेटले १८ चौका र ३ छक्काको मद्दतमा २०८ रन जोडे जसमा अमेरिकाविरुद्ध लिग खेलमा बनाएको ११५ रन सर्वाधिक थियो । ज्ञानेन्द्र मल्लले ५ इनिङ्समा ४४.५ को औसत र ८३.१७ को स्ट्राइक रेटले २२ चौका र ३ छक्काको मद्दतमा १७८ रन जोडे। फाइनलमा मल्लले ६६ बनाएका थिए । ज्ञानेन्द्र मल्लले ६ इनिङ्समा ३७.२ को औसत र ७६.५४ को स्ट्राइक रेटले १८ चौका र ४ छक्काको मद्दतमा १८६ रन जोडे । अनिल मन्डलले डेनमार्कविरुद्ध ११३ रन बनाएका थिए।
उता बायाँ हाते स्पिनर बसन्त रेग्मी प्रतियोगिताकै सर्वोत्कृष्ट खेलाडी सावित भए । ४९.५ ओभर फ्यालेका उनले ६.६६ को औसत र २.८ को इकोनोमी रेटमा २१ विकेट लिएका थिए । उनले अमेरिकाविरुद्धको दुबै खेलमा ५-५ विकेट लिए । त्यस्तै शक्ति गौचनले ४७ ओभर मा ९.८ को औसत र २.०७ को इकोनोमी रेटले १० विकेट हात पारे । मलेसियाविरुद्धको खेलमा उनले दश ओभरमा ८ मेडन सहित ३ रन दिँदै २ विकेटको उनको प्रदर्शन एक दिवसिय अन्तर्राष्ट्रिय खेलको सर्वोत्कृष्ट प्रदर्शन मध्येको एक हो ।

अन्य बलरको प्रदर्शन
अमृत : ७ विकेट, १६.५७ औसत, ३.४१ इकोनोमी
पारस : ९ विकेट, १५.५५ औसत, ४.११ इकोनोमी
सन्जम : ८ विकेट, १५.५० औसत, ३.७५ इकोनोमी
बिनोद : ४ विकेट, ३२.७५ औसत, ३.९६ इकोनोमी
कप्तान पारस खड्काको अलराउन्ड प्रदर्शन पनि तारिफ योग्य रह्यो । २९.६६ को औसतले ८९ रन बनाएका उनले प्रतियोगितामै सर्वाधिक ७ क्याच लिएका थिए ।
घरेलु प्रतियोगिताको कमी, छोटो समयको प्रशिक्षणका बावजूद नेपालले प्राप्त गरेको उपलब्धिको जति प्रशंसा गरे पनि कम नै रहला । पुबुदु दशानायकेले प्रशिक्षकको पद सम्हालेपछिका सुरुवाती दिनहरु कठिन थिए । केहि महिना अघि भएको टि-ट्वेन्टी क्वालिफायरमा सातौँ स्थान हात पारेपछि सुधारका आशा देखिएका थिए । र उनमा रहेको दुरदर्शिता र नेपाली क्रिकेटमा उनले चाहेको परिवर्तनका कारण युवा र प्रतिभाशाली तथा अनुभवी खेलाडीहरुको राम्रो सम्मिश्रण सहितको नेपाली टोलीले सफलता हात परेको हो । सधैं युवा टोलीले मात्र राम्रो प्रदर्शन गर्ने तर सिनियरहरुले भने निराश बनाउने परम्परालाई तोड्न नेपाली क्रिकेट टोली सफल भएको मान्न सकिन्छ ।

सफलतासँगै चुनौति पनि खडा हुन्छन् । सरकारी उपेक्षाबाट ग्रसित नेपाली क्रिकेटलाई स्थिरता आवश्यक छ र यसका लागि सरकारी क्षेत्रबाट प्रोत्साहन्, आर्थिक सुरक्षा र पर्याप्त घरेलु प्रतियोगिता तथा समय-समयमा बिदेशी भुमिमा बलिया टोलीसँग प्रतिस्पर्धा गर्नु पर्ने खाँचो छ । अहिलेसम्मकै उत्कृष्ट नेपाली टोली मानिएको यस समुहलाई नै निरन्तरता दिनु पनि आवश्यक देखिन्छ । विगतमा आर्थिक असुरक्षाका कारण खेललाई चटक्कै छाडेको उदाहरणहरु नभएका होइनन् । त्यसैले सरकार र सम्बन्धित निकाय गम्भिर भएर लाग्ने हो भने विश्वकप खेल्ने आशालाई वास्त्विकतामा बदल्न गार्हो नहोला । यस्तै प्रदर्शन जारी राख्ने हो भने विश्व क्रिकेट समुदायमा नेपालको इज्जत बढ्नेमा दुई मत छैन ।

प्रतिकृया दिनुहोस