खेलकुदबिहीबार, आषाढ १२, २०७१
अर्जेन्टिनासँग हारेर पनि नाइजेरिया अन्तिम १६ मा

अर्जेन्टिनाका फरवर्ड लियोनेल मेसीले प्रहार गरेको शट बाहिरिए पछि नाइजेरियाका गोलकिपर भिन्सेन्ट इनेयामा र मेसी । तस्वीरः एएफपी
ब्राजिलमा जारी विश्वकप फुटबल अन्तर्गत ११ असारमा भएको खेलमा अर्जेन्टिनाले नाइजेरियालाई ३–२ ले हराएको छ । जित्ने अर्जेन्टिना र हार्ने नाइजेरिया दुबै नकआउट चरणमा प्रवेश गरेका छन् ।
त्यस्तै समूह– ‘एफ’ कै अर्को खेलमा बोस्निया हर्जगोभिनाले इरानलाई ३–१ ले हराएको छ ।
दुई पटकको विश्वकप च्याम्पियन अर्जेन्टिना नौ अंकका साथ अर्को चरणमा प्रवेश गरेको छ भने इराकमाथि शानदार जीत हासिल गरे पनि बोस्निया अर्को चरणमा प्रवेश गर्न सकेन ।
समूह– ‘एफ’ मा नाइजेरियाले एक खेलमा जीत र अर्कोमा बराबरी खेलेर ४ अंकका साथ दोस्रो चरणमा स्थान बनाएको हो ।
अर्जेन्टिना र नाइजेरियाको खेल अत्यन्तै रोमाञ्चक रह्यो । अर्जेन्टिनी स्टार खेलाडी लियोनेल मेसीले खेलको तेस्रो मिनटमा गरेको गोलको जवाफमा नाइजेरियाका मुसाले चौथो मिनटमा गोल गरे ।
काउण्टर अट्याकमा नाइजेरियाले गरेको गोलसँगै बराबरीमा रहेको खेललाई पहिलो हाफको थप समयमा गोल गरेर मेसीले अर्जेन्टिनालाई २–१ को अग्रता दिलाए ।
मध्यान्तरपछिको खेल शुरु भएको दुई मिनटमै नाइजेरियाका मुसाले अर्को गोल गर्दै खेललाई २–२ को बराबरीमा पुर्याए ।
अन्तिममा अर्जेन्टिनाका मार्कोस रोजोले खेलको ५० औं मिनटमा गरेको गोल निर्णायक हुन पुग्यो र अर्जेन्टिनाले ३–२ को अन्तरले खेल जित्यो ।
इरानको हार
यसै समूहको अर्को खेलमा बोस्निया हर्जगोभिनाले इरानलाई ३–१ को फराकिलो अन्तरले हराएर दर्शकहरुलाई चकित बनायो ।
प्रतियोगिताका अन्य खेलहरुमा राम्रै प्रदर्शन गरेको इरानले अर्जेन्टिनासँग १–० को अन्तरले मात्रै हारेको थियो भने नाइजेरियालाई गोलरहित बराबरीमा रोकेको थियो ।
तर, बोस्निया हर्जगोभिनासँगको खेलमा भने इरानले ३ गोल खानु पर्यो ।
प्रतिकृया दिनुहोस
ताजा अपडेट
हिमालखबर जनमत
